Festival das Letras 2024

Presentamos un resumo audiovisual do noso Festival das Letras 2024, que celebramos no día de onte como peche final do Mes das Letras.

Un festival que acolleu xéneros diversos, mais todos eles dinamizando a lingua, homenaxeando a Luísa Villalta, dando tratamento ao noso Proxecto Documental Integrado e, sempre, valorando o noso: música, poesía, banda deseñada, teatro... 

O broche final foi a canción de produción propia, "Galicia Elemental" do grupo "Musicadoiro" coordinado polo mestre de Música e Danza, Keko, e que se pode escoitar ao longo do presente vídeo.

Parabéns a tod@s polas fantásticas producións e só nos queda dicir...

FELIZ DÍA DAS LETRAS GALEGAS

HOXE E TODOS OS DÍAS DO ANO!

Premiad@s: VI Concurso de Podcasts-Radio na biblio

Estamos en hora boa, o podcast de 6º de educación infantil resultou premiado no VI Concurso de Podcasts-Radio na biblio cunha produción propia a modo de concurso que percorre a biografía de Luísa Villalta e co acompañamento do acordeón de Suso Moreira.

O podcast será difundido na páxina web da Radio Galega e na plataforma dixital A Galega Audio e a asignación do premio (1.250 €) será destinada, tal e como recolle a convocatoria do concurso, a melloras no laboratorio de radio ou actividades relacionadas co seu funcionamento, sempre vinculado á biblioteca do centro. Escoitade con atención se a Luísa Villalta queredes coñecer e ata podedes probar, a ver se sodes quen de respostar:

A aula de 4º de primaria tamén presentou ao concurso o seu podcast "Luísa Villalta, nós tamén somos activistas", que a modo de entrevista fantástica destaca a figura de Luísa Villalta, a súa implicación social e gran activismo; o mesmo que demostra o grupo de 4º desenvolvendo diversas tarefas e proxectos relacionados co coidado do medio, a reciclaxe... mellor escoitalos, porque teñen moito que contar:

PARABÉNS A TOD@S! Producións propias que xa forman parte dos programas de Radio Balea, a Radio na Biblio do CEIP Milladoiro de Malpica de Bergantiños.

Mes das Letras 2024: visita libraría Aenea

Premer na imaxe para acceder á galería de fotos

Un curso máis, dentro da programación do noso Mes das Letras, recibimos a visita de libraría Aenea. Unha visita que, ademais de lecturas compartidas, nos achegou aos libros e outros materiais que foron divulgados por Lola, libros de ficción e de non ficción: informativos, banda deseñada, narrativa..., así como xogos varios e ata un kamishibai. 

Tod@s puideron botar o ollo a próximas peticións lectoras as súas familias, así como o profesorado e a biblio realizamos novas adquisicións que serán dinamizadas o vindeiro curso escolar.

Grazas infindas a Lola por achegarnos o marabilloso mundo dos libros.

Encontro con Jorge Campos

Premer na imaxe para acceder ao álbum de fotos

O pasado venres 10 de maio o alumnado do 2º ciclo de primaria mantivo un encontro con Jorge Campos.

Jorge Campos, ilustrador e autor, iniciou o encontro con contidos básicos de banda deseñada: historia, partes dun cómic... Posteriormente, respondeu a todas as preguntas en relación co seu exemplar: "Capitán Lentella", título do Plan Lector Anual da aula de 4º de primaria; así como asinou os exemplares de tod@s, con ilustración incluída, e tamén nos deixou asinada a lámina das ilustracións que realizou.

O alumnado puido ver o proceso de ilustración, en vivo, dos diversos personaxes de "Capitán Lentella" e recibiu a boa nova, de boca do autor, da próxima publicación de "Capitán Lentella 2"; o que levou a que o alumnado de 4º de primaria pida para o vindeiro curso que se inclúa nos títulos do Plan Lector este exemplar en 5º de primaria (petición recibida e... aprobada!)

Só nos queda dicir que foi un auténtico pracer contar con Jorge Campos, pola súa dispoñibilidade, bo facer e amabilidade en todo momento. Ao tempo, dicir que Jorge quedou encantado coa produción propia que elaborou o alumnado de 4º de primaria, coa súa titora Belén como orientadora e guía do proceso, ao redor do título.

Engadir que Jorge foi o encargado de realizar o póster do presente curso, "Unha biblioteca escolar en viñetas", da Asesoría BEGA e que temos publicado na columna do presente blog.

O vindeiro curso... máis encontros!

Lectura e Familias: "O libro máxico" de Migallas Teatro

 

O vindeiro luns 13 de maio, ás 16:00 horas, na nosa biblio contaremos con Migallas Teatro e a súa función "O libro máxico"

O programa Lectura e Familias posibilita, un curso máis, que poidamos dinamizar actividades culturais para a nosa pequena comunidade.

Diversión e aprendizaxe para tod@s.

Achegamos o álbum de imaxes da xornada tan divertida que vivimos na nosa biblio con Migallas Teatro. María e Carlos leváronnos por mundos máxicos grazas a... UN LIBRO! Nen@s e familias gozaron xunt@s, valorando o poder máxico da lectura.

Premer na imaxe para acceder á galería de fotos

"Lingoreteira" de Xarope Tulú

Premer na imaxe para acceder á galería de fotos

No día de hoxe, o alumnado de primaria asistiu ao espectáculo Lingoreteira, de Xarope Tulú, facilitado polo Concello de Malpica dentro da súa programación "Malpica nun mar de letras"

Un espectáculo que combina a narración oral e a música, facendo viaxar ao público por diversos contos, a disposición na nosa biblio, como:

Agradecid@s ao Concello de Malpica por, un curso máis, invitarnos a espectáculos culturais na nosa lingua.

Formación Biblio Creativa: Tale-Bot

Pechamos as formacións de Biblio Creativa, impartidas por Maker Store, coa robótica.

Unha xornada na que o alumnado de infantil, da man de Cati, descubriu os múltiples robots que nos acompañan no día a día (lavadoras, aspiradoras...) e descubriu con Tale-Bot un mundo de animais, reciclaxe e arte.

Premer na imaxe para acceder á galería de fotos

Tale-Bot, un robot, que lles permitiu achegarse ao mundo da programación e a secuenciación: organización do pensamento, resolución de problemas e creatividade.

O vindeiro curso, na nosa biblio... máis creatividade en acción!

DichoLeo 2024

Damos continuidade ao noso Mes das Letras, presentando as pezas audiovisuais de cada grupo-aula para a nosa produción propia: DichoLeo 2024 en relación co PDI que nos ocupa.

Dinamizando a nosa lingua e desenvolvendo a alfabetización audiovisual damos tratamento as interferencias lingüísticas, ampliando vocabulario na lingua nai.

Parabéns a tod@s, o vindeiro curso... máis!

Mes das Letras: Galicómic 2

Galicómic 2_PDI "Medicus curat, natura sanat"_2023-24

Leer más publicaciones en Calaméo

Presentamos, en formato dixital, a segunda edición do noso Galicómic, 2023-24, producións propias en formato banda deseñada e facendo uso da fotografía ou a técnica chroma key.

Temáticas diversas que gardan relación co PDI que nos ocupa: natureza, saúde e benestar persoal e social, protagonizadas pol@s nen@s.

Unha produción propia que xa está na imprenta para a súa encadernación, valorando o traballo desenvolto ao longo do curso escolar.

Un ano máis, parabéns a tod@s!

Continuará...

Lectura... na rúa! e pícnic saudable

Premer na imaxe para acceder á galería de fotos

Un curso máis, celebramos o Día do Libro saíndo á rúa e este curso, en relación co PDI que nos ocupa, o alumnado elaborou diversas receitas para as merendas saudables: espetos e batidos de froita, tostas de tomate con xamón, galletas de avea ou vasiños de froita e noces.

A lectura na rúa e o pícnic saudable foron protagonistas da conmemoración neste noso Mes das Letras 2024. Tod@s exerceron o seu dereito a ler en calquera sitio e a gozar de merendas saudables.

Achegamos un vídeo-resumo das diversas xornadas de lectura e merenda saudable:

Feliz Día do Libro, todos os días do ano e.. que aproveite!

Encontro con Eva Mejuto: "O día que choveron gatos"

Damos continuidade ao noso Mes das Letras 2024 co encontro entre o alumnado de 6º de primaria e a autora Eva Mejuto, facilitado pola editorial Xerais.

O título do Plan Lector Anual da aula de 6º de primaria, "O día que choveron gatos", motivou o encontro para coñecer, en persoa, a escritora do libro. Ao tempo, Eva respondeu a todas as preguntas en relación co libro e con moitos outros títulos da súa autoría: a súa traxectoria vital e literaria.

Premer na imaxe para acceder á galería de fotos

Agradecemos a Eva a súa dispoñibilidade e amabilidade, o alumnado quedou encantado de coñecela e presentarlle as súas creacións artísticas ao redor do libro, mesmo puido levar un borrador da segunda parte do mesmo, escrita por Alejandro García, para a exposición de aula.

Achegamos o podcast gravado en Radio Balea, partindo dalgunhas das preguntas-respostas realizadas na biblio, para que o seu paso polo noso cole perdure en... escrita, imaxe e son.

Estaremos atent@s a próximas publicacións da autora.

AS NOSAS LETRAS!: Luísa Villalta

Premer na imaxe para acceder á galería de fotos

Pechamos o último trimestre das exposicións AS NOSAS LETRAS! con Luísa Villalta, a quen se adica o Día das Letras Galegas 2024.

Exposición que dinamiza exemplares varios ao redor da biografía da autora, para coñecela e valorala pola súa contribución á cultura de Galica e á lingua galega. Ao tempo, achegamos enlaces a recursos en liña para ampliar información e contar con recursos didácticos para as aulas:

• Primavera das Letras

• Seminario Galán

O vindeiro curso continuaremos dinamizando, divulgando a máis boas/bos, xenerosas/os da nosa cultura.

Punto Laranxa e "Pasando a Bóla"

Premer na imaxe para acceder á galería de fotos

Chegou a todos os colexios públicos de Galicia o Punto Laranxa contro o acoso e o ciberacoso escolar. Un punto físico para deixar no seu buzón mensaxes escritas ao redor de situacións de acoso propias ou que se perciban en terceiros. Un punto tamén virtual, a disposición na web do noso colexio.

O alumnado de 6º de primaria foi o encargado de inFORMAR ao resto de alumnado, mesmo creando un cartel moi ilustrativo para o Punto Laranxa do noso cole.

Ao tempo, grazas ao Consorcio Editorial, iniciamos o noso Mes das Letras 2024 coa actividade cultural de A Xanela do Maxín: Pasando a Bóla para o alumnado de 2º e 3º ciclo de primaria e inspirada no título de Celtia Figueiras "A Banda dos Insectos. Pasando a Bóla" que David nos entregou en doazón.

Premer na imaxe para acceder á galería de fotos

Unha representación teatral, dirixida por David, na que o alumnado desenvolveu un papel activo, protagonizando diversas escenas de acoso nas que o público participa aportando posibles solucións ás situacións representadas.

No seguinte vídeo podedes visualizar como a Roncolla realiza unha das súas reflexións finais de cada escena ao redor do termo "chivato" e como @s nen@s voluntari@s len, a modo de peche da actuación, os diversos dereitos aportados por David, que tamén alude aos deberes de tod@s.

Dereitos e deberes para desenvolver unha convivencia respectuosa e pacífica na que TOD@S contamos moito e temos moito que contar, pola nosa saúde e benestar persoal e social.

Exposición PDI_3º trimestre

Premer na imaxe para acceder á galería de fotos

Presentamos a última exposición do curso escolar ao redor do PDI que nos ocupa, como recursos bibliográficos para as actividades a desenvolver da proposta trimestral.

 Unha exposición para seguir dinamizando lecturas diversas, para tod@s: mes das letras, medio ambiente, natureza, habilidades olvidadas...

O vindeiro curso... máis lecturas!

Proposta de actividades_3º trimestre

3ºT_Actividades 2023-24

Leer más publicaciones en Calaméo

Presentamos a proposta de actividades para a recta final de curso. Unha proposta que acolle o noso Mes das Letras e o Día do Medio Ambiente, entre outros, con actividades diversas: lectura activa, encontros, visitas, creatividade, reciclaxe e moito máis.

Un trimestre para valorar, concienciar, divulgar...

Leo le... NOVIDADES!_2º e 3º trimestre

 

Premer na imaxe para acceder á galería de fotos

Presentamos os libros que ocuparon o expositor Leo le... NOVIDADES!, ao longo do 2º trimestre e inicio do presente 3º trimestre.

Celebramos o Día do Libro Infantil 2024 coas novas adquisicións que xa catalogamos e viaxan ás aulas, aos domicilios... para gozar da lectura, hoxe, e todos os días do ano.

A seguir lendo... crecendo!

Formación Biblio Creativa: E-textiles

O alumnado de 6º de primaria desenvolveu a formación de Biblio Creativa da man de Cati e Flor de Maker Store (Carballo).

Os e-textiles foron o contido protagonista: tecidos que inclúen compoñentes electrónicos como baterías, LEDs, sensores...

Nen@s desenvolvendo as súas habilidades creativas, artísticas e pensamento computacional, habilidades do século XXI.

Premer na imaxe para acceder á galería de fotos

Unha vez máis, Cati e Flor primaron o proceso sobre o produto final, un proceso altamente creativo e de autocoñecemento.

Un fin de trimestre entre fíos condutivos, LEDs e... creatividade!

Formación Biblio Creativa: programando!

Pechamos o 2º trimestre coa formación de Biblioteca Creativa impartida, por Cati e Flor de Maker Store (Carballo), ao alumnado de 1º ciclo de primaria.

Premer na imaxe para acceder á galería de fotos

Unha xornada na que desenvolveron a programación por bloques mediante a ferramenta Scratch Junior, a cal se pode acceder premendo no seguinte enlace:

SCRATCH JUNIOR

Ao tempo, achegamos enlace ao recurso recollido na nosa páxina "Recursos dixitais" para saber máis:

• Scratch Jr: aprendiendo a programar y programando para aprender

Agradecemos a Cati e Flor o seu bo facer, nen@s disfrutaron da sesión aprendendo a programar, ademais de aprender a organizar o seu pensamento, a resolver problemas, a ser creativ@s...

Continuará...

Día da Poesía: Ramón Romero Nogueira

No día de hoxe, Día da Poesía 2024, o alumnado de infantil e 1º ciclo de primaria mantiveron un encontro dixital con Ramón Romero Nogueira, autor do exemplar "A abelliña que perdeu as ás" e que adquirimos no 1º trimestre con dedicatoria incluída do autor.

Un encontro no que Ramón nos contou que, este seu primeiro libro, foi un relato que escribiu cando era neno e co tempo foi mellorando, ata a súa publicación. Ao tempo, presentounos á abelliña e aos animais da fraga que a acompañan, mediante as ilustracións de Uxía Pin.

Premer na imaxe para acceder á galería de fotos

Un texto poético protagonizado por unha abelliña que percorre a fraga na busca de..., recomendamos a súa lectura polo fermoso texto rimado, as coloridas ilustracións e... un final inesperado!

Grazas infindas a Ramón pola súa dispoñibilidade e amabilidade.

Feliz Día da Poesía, hoxe e todos os días do ano!